ONENA EMATEKO GARAIA

"EAJ-PNVk gogotsu lan egingo du, bai hemen eta bai Madrilen gehiago luza ezin daitekeen egoera hau desblokeatzeko” esan du hautagai jeltzaleak. “Baina horretarako beharrezkoa izango da Donostiako gizartea ere eraginkortasunez mugitutzea, giza-legez, irmoki eta kontzientziatuta, ezinbesteko gune hori hiriaren zerbitzura jartzeko”.

Donostia urte gehiegiz bizi izan da Urumeari bizkarra emanda, hain zuzen ere datozen urteetako hiri garapenerako ardatz nagusi izango denari bizkarra emanda. Hiriak korridore estrategiko honen behar handia dauka etorkizunerako. Horregatik Loiolako kuartel militarrak hor erdian egoteak sekulako kaltea eragiten du, “lur eremu hori Donostiaren zerbitzura jartzea erabat hipotekatzen duelako”, azpimarratu du Donostiako alkatetzarako EAJren hautagaiak, Eneko Goiak.

“Erabat onartezina da, zerbitzu militarra kendu eta hamar urtera, Loiolako terrenoek donostiarrok ikusi ere egin nahi ez ditugun kuartel militarrek hipotekatuta jarraitzea”, salatu du Eneko Goiak.

“Gai honetan Odón Elorzaren gobernuak erabateko erresoluzio falta erakutsi du, eta Donostiaren interesak defendatzen aritu beharrean, Espainiako Defentsa Ministerioaren delegatua bailitzan jokatu du. Horren aurrean, EAJk ahal duen indar guztiarekin lan egingo du, bai hemen eta bai Madrilen, gehiago luza ezin daitekeen egoera hau desblokeatzeko”, adierazi du hautagai jeltzaleak.

“Baina ez da erraza izango; donostiarrok argi dugu Loiolatik militarrak ateratzeko askoz gehiago beharko dugula”, gogorarazi du Eneko Goiak. “Soldadutza ere ez zen “asperraldi” bategatik amaitu, milaka pertsonen konpromisoagatik eta sekulako presio sozialagatik baizik. Horrek lortu zuen arrazoia espiritu kastrenseari gailentzea. Kasu honetan ere ez da ezberdina izango. Ezinbestekoa izango dugu Donostiatik benetako apustua egitea eta donostiarren etorkizunerako hain beharrezkoa den gune hau gure zerbitzurako lortzea. Eta horretarako lana eta presioa irmoki, zibismoz eta kontzientziazio sozialez egin beharko dugu”, baieztatu du Eneko Goiak.

URUMEAKO ARDATZA: GARAPEN EKONOMIKO ETA URBANORAKO POLO BERRIA

Tabakalerak, AHTren geltokiak eta autobusen geltokiak osatzen duten gunea diseinu integralarekin eraikitzea.
Mundaiz eta Tabakalera artean kokatzen den poligonoa jarduera ekonomikorako gune bihurtzea, Tabakaleraren eta AHTren geltokien gertutasunak aprobetxatuta.
Riberas Loiolaren eta Aldunaeneren eraikuntza amaitzea.
Kuarteletan “Urume XXI” proiektua eraikitzea. Etorkizuneko proiektu urbano mixtoa da, zeinetan gazteentzat bizitzeko guneak eta jarduera ekonomikorako guneak nahastuko diren.
Txomin-enekoa desjabetzea amaitu eta urte honetan bertan hasi auzo berriaren eraikuntza. Errepide zaharra (Sierra de Aralar – Aintzieta paseoa – Martutene paseoa) bulebaritzatu.

Ibai-paseoa Martuteneraino guztiz eraiki Urumeako ezker ibarrean, aisialdirako eta arraunerako Ibaialde zentroa barne, eta eskuin-ibarreko paseoa proiektatu lanak hasteko.

URUMEA XXI PROIEKTUA

Egun Loiolako kuartel militarrak dauden lurzoruaren kokapenak eta hedadurak leku ezin hobea egiten dute proiektu anbizioso bat garatzeko: Urumea XXI proiektua. Batez ere gazteentzat zuzendutako proiektu horrek jarduera ekonomikorako guneak eta etxebizitza guneak uztartu nahi ditu, polo moderno bat sortuta.

Baina proiektu hau garatu ahal izateko, Donostiak beharrezkoa izango du mobilizazio sozial handi bat egitea datozen urteetan. Eta mugimendu hori Donostiako Udalak lideratu behar du. Argi eta garbi utzi behar zaio Espainiako Defentsa Ministerioari Donostian gauzak asko aldatu direla, eta beharrezkoa duela bere etorkizun sozial eta ekonomikorako terreno horiek berreskuratzea.