ONENA EMATEKO GARAIA

“40 urte funtzionamenduan egon ondoren, Donostiako Saihesbidearen trafikoa nabarmen ari da arintzen beste errepide batzuk ireki ostean. Horregatik, saihesbide honen funtzioa berpentsatu behar da. Loiolako biaduktua ken daiteke eta hori adibide bat baino ez da Donostiako errepideen iraultzak ekarri duen egoera berriak ireki dituen aukeren artean. Ikerketak egin beharko dira eta kontsentsua bilatu beharko da, ondo planifikatuta egin beharreko garrantzia handiko ekintzak baitira, eta ezin baitira presaka eta korrika egin”, azpimarratu du Eneko Goiak.

Azken hilabeteetan Donostiako errepide-sareak izan duen aldaketa sekulakoa da. Urtebete pasatxoan Donostiako 2. ingurabidea, Urumeako autobidea, eta “2. saihesbidea” Intxaurrondo-Martutene-Ospitaleak (GI-40) ireki dira. Horri esker, Sahiesbide zaharrak (GI-20) trafikoaren zati handiena galdu du eta aukera berriak ireki dira.

Egoera berri hau oso agerikoa da Loiola auzoan, La Salle ikastetxearen parean dagoen Saihesbidearen biaduktuak bitan zatitzen baitu ingurune hori azken hamarraldietan. GI-40 errepide berria indartzeak posible egingo du Loiolako biaduktua ezabatzea, eta horrela Loiolako bi aldeak elkartuko dira. Donostiaren etorkizunerako hain garrantzitsua den Urumearen ardatzean garapenerako aukera ezin hobeak eskainiko ditu zubia kentzeak.

URUMEAKO ARDATZA: garapen ekonomiko eta urbanorako gune berria

o Tabakalerak, AHTren geltokiak eta autobusen geltokiak osatzen duten gunea diseinu integralarekin eraikitzea.
o Mundaiz eta Tabakalera artean kokatzen den poligonoa jarduera ekonomikorako gune bihurtzea, Tabakaleraren eta AHTren geltokien gertutasunak aprobetxatuta.
o Riberas Loiolaren eta Aldunaeneren eraikuntza amaitzea.
o Kuarteletan “Urumea XXI” proiektua eraikitzea. Etorkizuneko proiektu urbano mixtoa da, zeinetan gazteentzat bizitzeko guneak eta jarduera ekonomikorako guneak nahastuko diren.
o Txomin-enekoa desjabetzea amaitu eta urte honetan bertan hasi auzo berriaren eraikuntza.
o Errepide zaharra (Sierra de Aralar – Aintzieta paseoa – Martutene paseoa) bulebaritzatu.
o Ibai-paseoa Martuteneraino guztiz eraiki Urumeako ezker ibarrean, aisialdirako eta arraunerako Ibaialde zentroa barne, eta eskuin-ibarreko paseoa proiektatu lanak hasteko.