ONENA EMATEKO GARAIA

Donostiako ekitaldian Miren Azkaratek, Donostiako Udalerako EAJren hautagaitzaren zerrendako bigarrenak, ere hitz egin du hirian kulturaren eta bereziki Tabakaleraren alde egin behar den apustuaz. Azkaratek azpimarratu duenez, “Tabakalera izango da sorkuntzaren teknologia parkea, I+G+b zentro erreferentea” eta bertako sortzaileentzat nahiz kanpokoentzat “Donostian eta Gipuzkoan egongo da sormena bideratzeko gune erreferente hori”.

Azkaratek gogoan izan ditu azken urteotan Donostian Artelekutik pasata egun munduan zehar dabiltzan artista donostiar, gipuzkoar eta kanpotarrak. “Guztientzat gune aproposa izango da Tabakalera, ikus-entzunezkoen, diseinuaren, arte plastikoen mundu egunetik egunera zabalago horretako produktuak gizarteratzeko gunea izango baita”, Kultura Sailburu ohiak dioenez.

Era berean, hautagai jeltzaleak azpimarratu du “euskarazko sorkuntzari lehentasuna” eman behar zaiola. “Euskal kultura guztiona delako, zuena eta gurea, duela 100 urte Antzoki Zaharraren eta Victoria Eugeniaren eskutik Donostia euskal kulturareren hiriburu izan zen moduan, Tabakaleraren eskutik izango da orain berriro ere euskal kulturaren hiriburu, Euskadira, Europara eta mundu osora begira”, aldarrikatu du Miren Azkaratek.