ONENA EMATEKO GARAIA

Gipuzkoako diputatu nagusia eta EAJ-PNVko hautagaia, Markel Olano irmo agertu da Gipuzkoako udaletxe sozialistetan aldaketa garaia iritsi dela adieraziz eta PSEren noraezean dagoen kudeaketaren alternatiba eraginkorrena EAJ-PNV dela esanez.

Andoainen egin den ekitaldi politikoan, bertako alkatetzarako hautagaia, Andoni Baltasarrekin batera, Markel Olanok argi eta garbi utzi du. “Ez dira eszisio eta zatiketarako garaiak, eta EAJ-PNVk pse-pp frontearekin ados ez daudenen eta sozialisten kudeaketaren deskalabruaren aurrean gestio egokia aldarrikatzen dutenen babesen alde lan egingo du”.

Lopezek eta Basagoitik argi utzi dute sortu duten pse-pp frontea ahalik eta erakunde gehienetara zabaltzeko prest daudela, eta hori ekiditeko aukera eraginkorrena EAJ-PNVk ordezkatzen du. “Ez gaitezen engaina” esan du Olanok. “Ongi gogoratzen dugu, Ibarretxeri azpikeria eginez Lopez Lehendakaritzan sartu zenean, euskal gizartea zur eta lur geratu zela. Bozka ematera joan ez zen jendea barne, ea horrek erremediorik ez zuen galdetzen zigun kalean”.

Hauteskunde gauean damurik ez duela balio esan du Olanok, beraz pse-pp frontearen aurrean “ubide zentral sendo eta irmoa agertzeko unea da, abertzaletasuna erakundeetatik aterarazteko duten helburua ekiditeko. Pse-pp fronateak erantzun sendoa eta irmoa merezi du bozketa egunean goiz goizetik”.

Halaber, Olanoren ustez, EAJ-PNVk sozialisten kudeaketaren deskalabruaren alternatiba ordezkatzen du. “Zapateroren eta Lopezen eredu ekonomikoan sinesten ez dutenen babesa elkartu nahi dugu, sozialisten eredu ekonomikoak ez gaituelako krisi egoera honetatik aterako”.

“Udaletxe sozialisten kontu publikoak erakustekoak dira ikus eta ikas dezagun hain justu ere zer den krisi egoeran egin behar ez dena”. Gastu arrunta topera eraman; inbertsioak gauzatzeko baliabide propioak sortzeko ez dira gai izan; zorra areagotu egin dute baina inbertsioetarako beharrean udaletxeen jarduera arruntari aurre egin ahal izateko, eta aurrezkiak agortu egin dituzte.

Beraz, ez dira gai izan baliabideak sortzeko eta zaintzeko eta “erantzukizunik gabeko kudeaketa gauzatu dute”.

Andoainen adibidez zeukatena baino gehiago gastatu dute, planifikaziorik gabe aritu dira. Edozein familiak bere etxean egiten duen bezala, udalak ez du egoki administratu. Horregatik, “sozialisten udaletan premiazko aldaketa unea iritsi da eta aldaketa EAJ-PNVren eskutik dator, austeritatean oinarrituta gestio antolatu eta eraginkor bat ordezkatzen baitugu” .