ONENA EMATEKO GARAIA

Olanok esan du krisia gainditzeko eta eraginkor kudeatzeko ezinbestekoa dela abertzaletasun instituzionala indartzea. “Gizarteak ez digu besterik eskatzen, krisiari erantzutea eta egoki jokatzea, herri honen pertsonengan eta enpresengan pentsatuz”.

EAJ-PNVren kudeaketa instituzionalak ibilbidea luzea egin du, esan du Olanok. Egoera ekonomiko konplikatuenetan erabaki garrantzitsuak hartu ditugu gure herrian oinarrituta. Erantzukizunez jokatuz, ulertzeko errazak izan ez diren erabakiak ere hartu behar izan ditugu, egoera ekonomikoa indartzera lagundu dutenak. Baita gure ongizatea mantentzera lagundu dutenak ere.

“Sistemak funtzionatu du eta ezin dugu orain eraikitako sistema arriskuan jarri”. Are gutxiago, Espainiako ekonomiak bururik altxatzen ez duenean. “Sozialisten eredu ekonomikoa agortua dago, porrot egin du. Ez da nik esaten dudalako, horrela diote nazioarteko erakunde nagusienek ere”.

Adreiluan oinarritzen den eredu ekonomikoa; %21eko langabezi tasa historikoa eragin duena; hemen, Euskadin, enpresa sektorearen mesfidantza lortu duena; udaletxeak topera zorpetu egin dituena… “atzerapena, pobrezia eta mesfidantza bakarrik eragin ditu”.

Gipuzkoako proiektu estrategikoek ezin dute jarrera politiko antagonikoen menpe geratu, horrexegatik inoiz baino beharrezkoa da Gipuzkoaren eraikuntza eraginkorra bultzatuko duen abertzale instituzionala indartzea.